ఆళ్వార్/ఆచార్యుల వాళి తిరునామములు – తొండరడిప్పొడి ఆళ్వార్ – సరళ వివరణ

శ్రీః శ్రీమతే శఠగోపాయ నమః శ్రీమతే రామానుజాయ నమః శ్రీమత్ వరవరమునయే నమః

పూర్తి వ్యాసమాలిక  

<< ఆండాళ్

తొండరడిప్పొడి ఆళ్వార్ యొక్క వైభవం 

తొండరడిప్పొడి ఆళ్వార్ జన్మనామము ‘విప్రనారాయణుడు’. ఆయన కుంభకోణం పరిసర ప్రాంతంలోని ‘తిరుమణ్ణంగుడి’ అనే పరమ రమణీయమైన క్షేత్రంలో, మార్గశిర మాసమందు, జ్యేష్ఠ  నక్షత్ర శుభ ఘడియలలో అవతరించారు. ఆయన మానవాళికి ‘తిరుమాలై’ మరియు ‘తిరుప్పళ్ళియెళుచ్చి’ అనే రెండు దివ్య ప్రబంధాలను అనుగ్రహించారు. వీటిలో ‘తిరుమాలై’ ప్రబంధం ఎంతటి మహోన్నతమైనదంటే… “తిరుమాలై అఱియాదార్ తిరుమాలైయే అఱియాదార్” అని పెద్దలు కొనియాడారు, అనగా ‘తిరుమాలై’ ప్రబంధ విశేషాలను తెలుసుకోని వారు, ఆ ‘తిరుమాల్’ శ్రీమన్నారాయణుని తత్వాన్ని అస్సలు గ్రహించలేరని భావం.

ఆ ఎంపెరుమాన్‌ను ఉషఃకాలంలో మేల్కొలిపే ‘తిరుప్పళ్ళియెళుచ్చి’ (సుప్రభాత గీతాలను) పాడిన వారు అత్యంత అరుదు. త్రేతాయుగంలో విశ్వామిత్ర మహర్షి శ్రీరామచంద్ర ప్రభువు కొరకై ప్రథమంగా సుప్రభాత గీతాన్ని (కౌసల్యా సుప్రజా రామా…) ఆలపించారని మనకు విదితమే. ఆ మహర్షి తదనంతరం, కేవలం మన తొండరడిప్పొడి ఆళ్వార్ మాత్రమే ఆ పెరియ పెరుమాళ్ శ్రీ రంగనాథస్వామిని మేల్కొలుపుతూ అంతటి మధురమైన ‘తిరుప్పళ్ళియెఴుచ్చి’ దివ్య ప్రబంధాన్ని గానం చేశారనే పరమార్థాన్ని మనం గ్రహించవచ్చు.

తొండరడిప్పొడి ఆళ్వార్ ఆ శ్రీరంగనాథునికి తప్ప మరే ఇతర పెరుమాళ్‌కు మంగళాశాసనం చేయలేదు. పరమాత్ముని అనేక అర్చావతారములలో ఆయన కేవలం శ్రీరంగనాథస్వామి దివ్య మంగళ స్వరూపాన్ని మాత్రమే ఏకధ్యానంతో సేవించి తరించారు. ఆయన సర్వోత్కృష్ట రచన అయిన ‘తిరుమాలై’ ప్రబంధంలో సదా భగవన్నామ సంకీర్తనం చేయడం వల్ల కలిగే మహిమలను అద్భుతంగా ఆవిష్కరించడమే కాక, ఆ ఎంపెరుమాన్‌కు సంపూర్ణంగా ఎలా శరణాగతి చేయాలో ప్రబోధించారు.

అంతేకాకుండా, భగవద్భక్తులను వారి కులగోత్రాలు, సంపద లేదా పాండిత్యాన్ని బట్టి ఎన్నడూ తక్కువ చేసి చూడకూడదని, వివక్ష చూపరాదని ఈ దివ్య ప్రబంధం ద్వారా జగత్తుకు చాటిచెప్పారు. భగవద్భక్తులందరూ సమానులే అనే పరమ సత్యాన్ని ఆయన ఎంతో స్పష్టంగా నిరూపించారు.

తొండరడిప్పొడి ఆళ్వార్ యొక్క వాళి తిరునామములు

తొండరడిప్పొడి ఆళ్వార్ యొక్క వాళి తిరునామములు— సరళ వివరణ 

మణ్ణంగుడియదనై వాళ్విత్తాన్ వాళియే

తన దివ్య అవతారము చేత ఆ ‘తిరుమణ్ణంగుడి’ పుణ్యక్షేత్రానికి సాటిలేని కీర్తి ప్రతిష్టలను, శాశ్వత వైభవాన్ని చేకూర్చిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

మార్గళియిల్ కేట్టైతనిల్ వందుతిత్తాన్ వాళియే

శ్రీ మద్భగవద్గీతలో ఎంపెరుమానులు ‘మాసములలో నేను మార్గశిర మాసాన్ని’ అని స్వయంగా ప్రకటించి, ఆ మార్గశిర మాసానికి మహోన్నతమైన వైభవాన్ని, పవిత్రతను చేకూర్చారు. అట్టి పరమాత్మకి అత్యంత ప్రీతిపాత్రమైన మార్గశిర మాసమందు, జ్యేష్ఠ నక్షత్ర శుభ ఘడియలలో ఈ భువిపై అవతరించిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

తెండిరై శూళ్ అరంగరైయే దైవమెన్ఱాన్ వాళియే

ఇక్కడ ‘అరంగర్’ అనగా ఆ పెరియ పెరుమాళ్ శ్రీ రంగనాథస్వామి అని భావం. తొండరడిప్పొడి ఆళ్వార్ తమ అనేక పాశురాలలో శ్రీ రంగనాథుడే సర్వోన్నతమైన ‘పరదైవం’ అని ప్రస్ఫుటంగా నిరూపించారు. ఉదాహరణకు, తమ ‘తిరుమాలై’ ప్రబంధంలో ఆయన “నాట్టినాన్ దైవమ్ ఎంగుమ్ నల్లదోర్ అరుళ్ తన్నాలే కాట్టినాన్ తిరువరంగమ్ ఉయ్బవర్క్కు ఉయుమ్ వణ్ణమ్” అని కీర్తించారు. అలాగే, “కట్ట్రినమ్ మేయ్త్త ఎందై” అనే వాక్యం ద్వారా ఆ కణ్ణన్ ఎంపెరుమానే (శ్రీకృష్ణుడే) సర్వోత్కృష్టడైన భగవంతుడని చాటిచెప్పారు. ఈ విధంగా తమ అనేక దివ్య ప్రబంధ పద్యాలలో, అర్చావతారమూర్తియైన శ్రీ రంగనాథుడే ఆ పరబ్రహ్మమని ఆయన దృఢంగా స్థాపించారు.  స్వచ్ఛమైన అలల తరంగాలతో, నిండుగా ప్రవహించే కావేరీ నదీమతల్లి ఒడిలో శోభిల్లే ఆ శ్రీరంగ దివ్యధామంలో శేషశయనుడై వేంచేసియున్న శ్రీ రంగనాథుడే అఖిలాండకోటి బ్రహ్మాండ నాయకుడని, ఆయనే పరమాత్మ అని చాటిచెప్పిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

తిరుమాలై ఒన్పతంజుమ్ శెప్పినాన్ వాళియే

తొండరడిప్పొడి ఆళ్వార్ మనపై అపారమైన కారుణ్యంతో నలభై ఐదు (45) పాశురాల పరమ పవిత్రమైన ‘తిరుమాలై’ ప్రబంధాన్ని అనుగ్రహించారు. ఈ ప్రబంధంలో, ఆ ఎంపెరుమాన్ తన అలౌకిక సౌందర్యము చేత మనలాంటి జీవులను ఎలా సంస్కరిస్తారో అత్యంత సుందరంగా వివరించారు. అంతేకాక, 38వ పాశురమైన “మేంపొరుళ్ పోగ విట్టు” ద్వారా శరణాగతి యొక్క పరమ రహస్యాలను, సిద్ధాంతాలను ప్రబోధించారు. కేవలం అంతటితో ఆగక, ఆ భగవంతునికి శరణాగతి చేసిన అడియార్ల (భక్తుల) అనన్య భక్తి వైభవాన్ని కొనియాడుతూ… భగవద్భక్తులను ఏ విధంగా గౌరవించాలో 41వ పాశురమైన “పోనగమ్ శెయ్ద శేడమ్ తరువరేల్ పునిదమన్రే” ద్వారా లోకానికి చాటిచెప్పారు.

ఒక వ్యక్తి జన్మచేత సామాన్యుడైనప్పటికీ, లేదా భక్తుడిగా మారకముందు ఎలాంటి హీనమైన పనులలో నిమగ్నమై ఉన్నప్పటికీ… ఒక్కసారి వారు ఆ భగవంతుని శరణు వేడి దాసులుగా మారిన తర్వాత, వారి భోజన శేషాన్ని (ఉచ్ఛిష్టాన్ని/ప్రసాదాన్ని) స్వీకరించడం పరమ పవిత్రమైన ధన్యతగా, ఒక గొప్ప ఆశీర్వాదంగా భావించాలని ఆళ్వార్ ప్రబోధించారు. అట్టి మహోన్నతమైన నలభై ఐదు అమృత పాశురాలను మనకు ప్రసాదించిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

పణ్డు తిరుప్పళ్ళియెళుచ్చిప్ పత్తురైత్తాన్ వాళియే

ఆ శేషశయనుడైన రంగనాథస్వామిని తన యోగనిద్ర నుండి మేల్కొల్పడానికి, పది పరమ పవిత్ర పాశురాల ‘తిరుప్పళ్ళియెళుచ్చి’ ప్రబంధాన్ని మధురంగా గానం చేసిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

పావైయర్గళ్ కలవితనైప్ పళిత్త శెల్వన్ వాళియే

తొండరడిప్పొడి ఆళ్వార్ తమ ‘తిరుమాలై’ ప్రబంధంలో… లౌకిక మానవుడు తాను సకల సుఖభోగాలను అనుభవిస్తున్నానని భ్రమిస్తూ, నిజానికి తనపై తానే ఎంతటి అపారమైన కష్టాలను, సమస్యలను కొనితెచ్చుకుంటున్నాడో—’పెణ్డిరాల్ సుగంగళుయ్ప్పాన్ పెరియదోర్ ఇడుంబై పూండు’ (స్త్రీల మూలముగా భోగాలను అనుభవిస్తూ కొండంత కష్టాన్ని మోయుట) అనే వాక్యం ద్వారా ఎంతో హృద్యంగా వివరించారు. ఆళ్వార్ల యొక్క చరిత్రాత్మక జీవితాన్ని గమనించినా, ఒక స్త్రీ పట్ల ఏర్పడిన ఆకర్షణ కారణంగా ఆయన పడిన వేదన, అనుభవించిన కష్టాలు మనకు స్పష్టంగా అర్థమవుతాయి.

ఆయనకు ‘తొండరడిప్పొడి ఆళ్వార్’ అనే దాసనామము సిద్ధించకముందు, ‘విప్రనారాయణులు’ గా ఉన్న కాలంలో… ఆ ఎంపెరుమాన్ దివ్య లీల కారణంగా ఆయన ‘దేవదేవి’ అనే స్త్రీ వైపు ఆకర్షితులయ్యారు. ఆ తర్వాత, ఆ పరమాత్మయే స్వయంగా ఆయనను సన్మార్గంలోనికి మళ్ళించి, తిరిగి తన నిత్య కైంకర్య సేవలలో నిమగ్నం చేసుకున్నారు. ఈ దివ్య చరిత్ర ద్వారా ఆళ్వార్ తదనంతర జీవితంలో ఎంతటి మహోన్నతమైన వైరాగ్యాన్ని, అనాసక్తతను అవలంబించారో మనం గ్రహించవచ్చు. తమ ‘తిరుమాలై’ ప్రబంధంలో ఆయన ఇంద్రియ సుఖాలు ఆధ్యాత్మిక ప్రగతికి ఏ విధంగా తీవ్రమైన ఆటంకాలు కలిగిస్తాయో సవివరంగా నిరూపించారు.శాస్త్రాలు ఈ భౌతిక ప్రపంచంలో కొన్ని పరిమితమైన భోగాలను అనుమతించినప్పటికీ… జీవుని యొక్క యథార్థ స్వరూపాన్ని, ఆ ఎంపెరుమాన్‌తో మనకు గల నిత్య శేషత్వ సంబంధాన్ని నిశితంగా పరిశీలిస్తే, శారీరక సుఖాలన్నీ ఆత్మ స్వరూపానికి విరుద్ధమైనవని, వాటిని విసర్జించవలసిందేనని అదే శాస్త్రం స్పష్టంగా నిర్దేశిస్తోంది. వేదాంత సారం ప్రకారం, మోక్షాన్ని ఆశించే ముముక్షువులకు లౌకిక సుఖ త్యాగం అత్యంత ఆవశ్యకం. అయితే, అంతటి పరిపక్వత ఇంకా సిద్ధించని వారి కొరకై, వివాహ బంధం ద్వారా క్రమబద్ధమైన రీతిలో ఆ సుఖాలను అనుభవించవచ్చని శాస్త్రం ఒక మార్గాన్ని చూపింది. ఎప్పుడైతే ఆత్మకు యథార్థ జ్ఞానోదయం కలుగుతుందో, అప్పుడు ఈ బాహ్య సుఖాలు నిరర్థకమని వారే స్వయంగా గ్రహించి, సర్వవేళలా ఆ ఎంపెరుమాన్ అనుభవంలోనే పరమానందాన్ని పొందుతారు. తొండరడిప్పొడి ఆళ్వార్ అంతటి మహోన్నతమైన, ఇంద్రియాతీతమైన స్థితిలో నిలిచి ఉండడం వల్లే, లౌకిక సుఖాలను ఎందుకు దూరం పెట్టాలో తమ పాశురాల ద్వారా జగత్తుకు అంతటి సప్రమాణంగా బోధించగలిగారు. అట్టి పరమ వైరాగ్య సంపన్నుడై, ఆచరించి చూపి, మనకు ఆదర్శప్రాయమైన నిష్కామ జీవిత మార్గాన్ని అనుగ్రహించిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)! 

తొండు శెయ్దు తుళపత్తాల్ తులంగినాన్ వాళియే

ఆళ్వార్ శ్రీరంగనాథుని కొరకై స్వయంగా ఒక నందనవనాన్ని (పుష్ప వనాన్ని) నిర్మించి, ఆ వనం నుంచి పరమ పవిత్రమైన పరిమళ భరితమైన పుష్పాలను, తులసీ దళాలను సేకరించి, ఆ పెరుమాళ్ళకు ఎంతో రమణీయమైన మాలలను కూర్చి సమర్పించేవారు. ఈ మహోన్నతమైన కైంకర్య సేవలో తరిస్తూ ఆయన దివ్య తేజస్సుతో, అపరిమితమైన కాంతితో వెలిగారు. ఇక్కడ ‘తుళబమ్’ అనగా పవిత్రమైన తులసి అని భావం. అట్టి నిత్య పుష్ప కైంకర్యాన్ని ఆచరిస్తూ, ఆ పరమాత్మకి భక్తితో తులసి మాలలను సమర్పించిన ఆ తొండరడిప్పొడి ఆళ్వార్ సదా వర్ధిల్లాలి (పల్లాండు)!

తొండరడిప్ పొడియాళ్వార్ తుణైప్పదంగళ్ వాళియే

భగవద్భక్తుల చరణ రేణువులనే తన పరమ భాగ్యంగా భావించిన ఆ తొండరడిప్పొడి ఆళ్వార్ యొక్క మహోన్నతమైన, దివ్య చరణారవిందములు సదా వర్ధిల్లాలి (పల్లాండు)! ఇంతటితో తొండరడిప్పొడి ఆళ్వార్ యొక్క ‘వాళి తిరునామం’ మంగళకరంగా సంపూర్ణమగుచున్నది.

ఆళ్వార్ ఎంపెరుమానార్ జీయర్ తిరువడిగలే శరణం 

పొందుపరచిన స్థానము – https://divyaprabandham.koyil.org

ప్రమేయము (లక్ష్యము) – https://koyil.org 
ప్రమాణము (గ్రంథములు) – http://granthams.koyil.org 
ప్రమాత (పూర్వాచార్యులు) – http://acharyas.koyil.org 
శ్రీవైష్ణవ విద్య / పిల్లల కోసం – http://pillai.koyil.org