శ్రీ: శ్రీమతే శఠగోపాయ నమః శ్రీమతే రామానుజాయ నమః శ్రీమత్ వరవరమునయే నమః
దివ్యప్రబంధాలు ఆళ్వార్లుల అరుళిచ్చేయల్ (దయతో అనుగ్రహించినవి). వీటిని ముదలాయిరం, రెండాయిరం, ఇయర్పా మరియు తిరువాయ్మొళిగా విభాగం చేసిన విధానాన్ని మనము చూశాము. ప్రతి “ఆయిరం”లో ఏ-ఏ ప్రబంధాలు ఉన్నాయో కూడా వివరంగా చూశాము. ఈ కూర్పు శ్రీమన్నాథమునులు చేశారు.
నమ్మాళ్వార్ కృప వల్లనే మనకు దివ్యప్రబంధాల జ్ఞానం ఈ రోజున కలిగింది. శ్రీమన్నాథమునులు నమ్మాళ్వార్ నుండి ఈ ప్రబంధాలను వాటి అర్ధంతో సహా నేరుగా పొందారు. కణ్ణినుణ్ శిఱుత్తంబు అనే ప్రబంధాన్ని 12,000 సార్లు పఠించిన తరువాత వారికి ఆళ్వార్లుల కృప లభించింది.
చివరి ఆళ్వార్లు అయిన తిరుమంగై ఆళ్వార్లు తరువాత, శ్రీవైష్ణవ సంప్రదాయం అంతగా వికసించలేదు. అయితే, దివ్యప్రబంధాల పునరుద్ధరణ శ్రీమన్నాథమునుల ద్వారా కలిగింది. వారి శిష్యులు వాటిని ప్రచారం చేయటంతో శ్రీవైష్ణవం తిరిగి వ్యాప్తి చెందింది.
ఇప్పటి వరకూ, మనము ముదలాయిరాన్ని అనుభవిస్తూ, తిరుపల్లాండు, కణ్ణినుణ్ శిఱుత్తంబు, పేరియాళ్వార్ తిరుమొళి, తిరుప్పావై మరియు నాచ్చియార్ తిరుమొళి, సంక్షిప్తంగా పరిశీలించాము. ప్రతి ప్రబంధంలో ముఖ్యాంశాలు మరియు ప్రతిపాదించబడిన తత్వాన్ని గ్రహించాం.
ఇప్పుడు, మనము పెరుమాళ్ తిరుమొళి లోకి ప్రవేశిద్దాం.
పెరుమాళ్ తిరుమొళి:
ఇది శ్రీ కులశేఖర ఆళ్వార్లు అనుగ్రహించారు. వారిని ‘కులశేఖర పెరుమాళ్’ అని కూడా పిలుస్తారు. వారికి శ్రీరాముని పై అపారమైన అభిమానం, భాగవతులపై అత్యంత భక్తి ఉండేది. వారి రాజసభలో ప్రతిదినం రామాయణ కథా పారాయణం జరిగేది, మరియు వారు ఎల్లప్పుడూ ఆ రామ చరితము ఆస్వాదిస్తూ వినేవారు. శ్రీరంగానికి వెళ్లి శ్రీరంగనాథుని దర్శనం పొందాలని కోరిక ఉండేది.
వారు క్షత్రియ వంశంలో జన్మించిన గొప్ప యోధులు. కానీ ఎమ్పెరుమాన్ (భగవంతుని) కృపవల్ల నిర్మలమైన జ్ఞానాన్ని పొంది, గొప్ప శ్రీవైష్ణవుడయ్యారు. వారి రచనకు “పెరుమాళ్ తిరుమొళి” అని పేరు. శ్రీరామునిపై ఉన్న గొప్ప ప్రేమ కారణంగా వారిని ‘కులశేఖర పెరుమాళ్’ అని పిలుస్తారు. మన సంప్రదాయంలో శ్రీరాముని పేరు ‘పెరుమాళ్’గా ప్రాచుర్యం పొందింది — ఇది చాలా ఆళ్వార్లులు, ఆచార్యుల రచనల్లో చూడవచ్చు. అయితే మన సంప్రదాయంలో శ్రీకృష్ణుడిని మాత్రం ఎప్పుడూ ‘కన్నన్’ లేదా ‘కృష్ణన్’ అని, మన బిడ్డను పిలుచుకునే తీరులో పిలుస్తాం. నిజానికి ‘శ్రీ’ అనే గౌరవ సూచిక ఉపయోగించడం కన్నన్‌తో మన మధ్య దూరం కలిగిస్తుందనే భావన ఉంది, అందువల్ల అది వాడకూడదు అని సూచించబడుతుంది.
పెరుమాళ్ తిరుమొళి అద్భుతమైన తనియన్లు ఉన్నాయి. వాటి ద్వారా ఈ ప్రబంధం గొప్పతనాన్ని మనం అవగాహన చేసుకోవచ్చు.
మొదటి తనియన్
ఇన్నముధం ఊట్టుగెన్ ఇంగేవా పైంగిళియే
తెన్నరంగం పాద వల్ల సీర్ప్ పెరుమాళ్ – పొన్నం
సిలై సేర్ నుదలియర్ వేల్ సేరలర్ కోన్ – ఎంగల్
కులశేఖరన్ ఎన్ఱేకూరు
ఈ తనియన్ కులశేఖర ఆళ్వార్ల వైభవాన్ని వర్ణిస్తుంది. పెంపుడు చిలుకను సంబోధిస్తూ, చేర దేశపు రాజు, సదా శ్రీరంగం లో కొలువైవుండి, శ్రీ రంగనాథుణ్ణి కీర్తించే కులశేఖరుల కీర్తిని పాడాలి అని అంటున్నారు.
రెండవ తనియన్
ఆరం కెడ పరన్ అన్బర్ కొల్లార్ ఎన్ఱు ఆవర్గాలుక్కే
వారంగొడు కుడ పాంబిర్ కై ఇట్టవన్ – మఱలరై
వీరంగెదుత్త శెన్గోల్ కొల్లి కావలన్ విల్లవర్ కోన్
శేరన్ కులశేఖరన్ ముడి వేంధర్ శిగామణియే
ఈ తనియన్ కులశేఖర ఆళ్వార్లుల గొప్పతన్నాని మరియు వారికి భాగవతులపై ఉన్న అపారమైన ప్రేమను వివరించుతుంది. కొంతమంది మంత్రులు భాగవతులపై ఈర్ష్యతో, వారి పేరు పాడుచేసే ఉద్దేశంతో, దేవస్థానంలోని ఆభరణాలు దాచిపెట్టి, దాన్ని భాగవతులపై మోపారు.
కులశేఖర ఆళ్వార్లులు అది నిజం కాదని నిరూపించేందుకు విషపూరిత సర్పాలతో నిండి ఉన్న కుండలో చేతిని పెట్టి, “ఈ ఆభరణాలు భాగవతులు తీయలేదు” అని ప్రమాణం చేశారు. అప్పట్లో ఇది సత్యం చెప్పారు అనేదానికి ప్రమాణంగా ఉపయోగించబడేది. సర్పాలు వారిని కాటు వేయలేదు. దీనిద్వారా భాగవతుల నిర్దోషత్వాన్ని, వారిపై తమకు ఉన్న విశ్వాసాన్ని చాటి చెప్పారు. అట్టి కులశేఖర్లకు నమస్కరిస్తున్నాను అంటున్నారు.
పెరుమాళ్ తిరుమొళి గుణించి కొన్ని ప్రధాన విషయాలు:
- మొత్తం: 10 పదిగాలు, 105 పాశురాలు
- ప్రధానంగా శ్రీరామావతారం పై ఆధారపడి ఉంటుంది.
- మొదటి మూడు పదిగాలు – శ్రీరంగంలోని శ్రీరంగనాథునికి మంగళాశాసనం.
- నాలుగవ పదిగం – తిరువేంకటముడయాన్‌కు మంగళాశాసనం.
- ఐదవ పదిగం – తిరువిత్తువకోడుదివ్యదేశానికి మంగళాశాసనం.
- ఆపై, కృష్ణావతారాన్ని స్త్రీ భావంతో అనుభవిస్తారు (నమ్మాళ్వార్లు, తిరుమంగై ఆళ్వార్లులలాగా).
- చివరి మూడు పదిగాలు – శ్రీరామావతారాన్ని అద్భుతంగా అనుభవించారు.
మంగళాశాసనం చేసిన దివ్యదేశాలు- శ్రీరంగం, తిరువేంకటం, తిరువిత్తువకోదు, తిరుచ్చిత్రకూడం (చివరి పదిగం) తిరుచ్చిత్రకూడాన్ని శ్రీరాముడు వనవాస సమయంలో గడిపిన చిత్రకూటానికి సమానంగా భావించి, గోవిందరాజపెరుమాళ్ కూడా ఇక్కడ అనుభవవించారు.
శ్రీరామాయణం శరణాగతి శాస్త్రంగా పరిగణించబడుతుంది. పెరుమాళ్ తిరుమొళి రామావతారం గురించే ప్రధానంగా ఉంది కనుక, అది కూడా శరణాగతి శాస్త్రమే. శ్రీ రామాయణంలో శరణాగతికి ఉదాహరణలు మనకు కనిపిస్తాయి. దేవతలు పెరుమాళ్ళ వద్ద చేశారు, దశరథుడు పరశురాముని వద్ద, లక్ష్మణుడు స్వామి- పిరాట్టి వద్ద, భరతుడు- శ్రీ రాముని అరణ్యం నుండి తిరిగి రమ్మని, విభీషణుడు పెరుమాళ్ళ వద్ద, సాక్షాత్తు శ్రీ రాముడు సముద్రుని వద్ద చేశారు.
పెరుమాళ్ తిరుమొళి శరణాగతి గొప్పదనాన్ని వివరిస్తుంది .
మొదటి పదిగం లో ఆళ్వార్లులు శ్రీరంగనాథుని వద్ద శరణాగతి చేశారు. శరణాగతి చేసినవారి (ప్రపన్నుల)కి ఈ ఆరు లక్షణాలూ సహజంగా కలుగుతాయని పెద్దలు సాయిస్తారు.
- అనుకూల్యస్య సంకల్పం – భగవంతునికి ఇష్టమైనదే చేయాలన్న సంకల్పం
- ప్రాతికూల్యస్య వర్జనం – ఆయనకు నచ్చనిది చేయకూడదు
- గోప్తృత్వ వరణం – భగవంతుడే రక్షకుడిగా స్వీకరించడం
- కార్పణ్యం – మనకు ఏదీ లేదన్న భావన
- మహా విశ్వాసం – ఆయన రక్షిస్తారన్న గట్టి నమ్మకం
- ఆత్మ నిక్షేపణం – మన ఆత్మను పూర్తిగా ఆయనకే సమర్పించడం
“ఉరంగువాన్ కైపందం పోలే” అనే ఉపమానం ద్వారా, నిద్రలోకి జారుకున్న వాని చేతినుండి పుస్తకం దానంతట అదే క్రింద పడినట్లు, ఈ లక్షణాలు ప్రపన్నుడిలో సహజంగా వృద్ధి చెందతాయని వివరించబడింది.
ఈ ఆరు లక్షణాలు తరువాతి పదిగాలలో వివరింపబడ్డాయి.
- తర్వాతి పదిగంలో, ఆళ్వార్లులు ప్రపన్నుల అనుభవాన్ని చూపిస్తారు. ఇది అనుకూల్యస్య సంకల్పం యొక్క ఉదాహరణ; ఎందుకంటే ఎమ్పెరుమాన్ మనకు తమ ప్రపన్నుల పట్ల అనుకూలంగా ఉండాలని కోరుకుంటారు.
- తర్వాతి పదిగంలో, ఆళ్వార్లులు ప్రాతికూలస్య వర్జనాన్ని ప్రదర్శిస్తారు, ఈ భౌతిక శరీరాన్ని మరియు ఈ భౌతిక లోకంతో ఉన్న సంబంధాన్ని కోరుకోరు.
- తర్వాతి పదిగంలో, “తిరువిత్తువకొట్టు ఎమ్పెరుమాన్” యొక్క అనుభవాన్ని పొందినప్పుడు తమ కర్పణ్యం గురించి మాట్లాడుతారు. ఎమ్పెరుమాన్ యొక్క తిరువడి తప్ప తమకు మరొక గతి లేదని సాయిస్తారు.
- తర్వాతి పదిగంలో, “తిరువేంకటముడయాన్ ” యొక్క అనుభవాన్ని పొందినప్పుడు, తమ ఏకైక ఆకాంక్ష ఎమ్పెరుమాన్ యొక్క ఆనందానికి అక్కడ ఉండడం అని ప్రకటించుకుంటారు మరియు మరొక లక్ష్యమేదీ తమకు లేదు.
- ఆర్చావతార ఎమ్పెరుమాన్ యొక్క అనుభవాన్ని చేసిన తరువాత, కృష్ణావతారం యొక్క అనుభవాన్ని ప్రతిబింబిస్తారు. ఒక పదిగంలో దేవకి యొక్క బాధతో నిండిన స్వరం ఉంటుంది, మరొక పదిగంలో గోపిక యొక్క భావాన్ని ప్రతిబింబిస్తుంది.
ఇది తరువాత, చివరి మూడింటిలో ఆళ్వార్లులు శ్రీరామావతారాన్ని అనుభవిస్తారు. “మన్నుపుగళ్…” పదిగంలో, కౌసల్యాదేవి భావంలో, శ్రీరామునికి ఒక అందమైన తాలాటు (లాలిపాట) పాడుతారు. తరువాతి పదిగంలో, వనవాసానికి శ్రీరాముడు వెళ్లిన తరువాత, ఆయనతో విడిపోవడం వల్ల దశరథుని వేదనను, బాధను ఆళ్వార్లులు వ్యక్తపరుస్తారు. .
చివరి పదిగంలో, రామాయణ చరిత్రను సంపూర్ణంగా, అందంగా మరియు సులభంగా వివరించుతారు. చివరగా, శ్రీచిత్రకూటం ధివ్యదేశంలో ఎమ్పెరుమాన్ నివసిస్తున్నారని స్తుతిస్తూ, ఈ అద్భుతమైన ప్రబంధాన్ని ఆళ్వార్లులు ముగిస్తున్నారు.
ఇక్కడ మరో ముఖ్యమైన విషయాన్ని గుర్తుంచుకోవాలి — మొదటి పదిగంలో ఆళ్వార్లులు ఎమ్పెరుమాన్ వద్ద శరణాగతి చేసిన వెంటనే, రెండవ పదిగంలో ఎమ్పెరుమాన్ ఆశ్రితుల వైభవాన్ని ప్రకటిస్తారు. ఇది ఈ ప్రబంధంలోని అత్యంత ముఖ్యమైన అంశాలలో ఒకటి.
తిరుచంద విరుత్తం
ఇది ఒక అద్భుతమైన ప్రబంధం. ఇది మనకు తిరుమళిశై పిరాన్ ప్రసాదించినది. శ్రీరామునిపై ఉన్న అపారమైన ప్రేమ కారణంగా కులశేఖర ఆళ్వార్లులును “కులశేఖర పెరుమాళ్” అని పిలిచినట్లు, తిరుమళిశై ఆళ్వార్లులును కూడా “తిరుమళిశై పిరాన్” అని పిలుస్తారు.
తిరుక్కుడన్దై ఎమ్పెరుమాన్‌కు “ఆరావముధ పిరాన్” అనే దివ్యనామం ఉంది. తిరుమళిశై ఆళ్వార్లులు ఈ ఆరావముధ పిరాన్‌తో ఉన్న అపారమైన ప్రేమ మరియు సంబంధం వలన “తిరుమళిశై పిరాన్”గా ప్రసిద్ధి పొందారు. అలాగే, తిరుక్కుదంతై ఎమ్పెరుమాన్‌ను “ఆరావముధ ఆళ్వార్లు” అని కూడా పిలుస్తారు. ఈ విధంగా ఎమ్పెరుమాన్ మరియు ఆళ్వార్లు ఒకరికి ఒకరు బిరుదులను మార్చుకోవడం వల్ల వారి మధ్య ఉన్న పరస్పర ప్రేమ మరియు అనుబంధం ప్రతిబింబిస్తుంది.
తిరుమళిశై ఆళ్వార్లులు రెండు ప్రబంధాలు రచించారు – “నాన్ముగన్ తిరువందాది” మరియు “తిరుచ్చంద విరుత్తం”. ఇవే వారు రచించిన ప్రబంధాలలో మనకు అందుబాటులో ఉన్నవిగా భావించబడతాయి. గురుపరంపర ప్రభావం ప్రకారం తిరుమళిశై ఆళ్వార్లులుకు సుమారు 4,700 సంవత్సరాల పాటు ఈ లీల విభూతి లో వేంచేసి ఉన్నారని తెలుస్తుంది. ఆళ్వార్లు అనేక గ్రంథాలు/ప్రబంధాలు రచించారు. అయితే, “వాటిని చదివి ఆస్వాదించేవారు ఎవరు?” అనే భావనతో తమ రచనలు అన్నిటినీ కావేరి నదిలో కలిపివేశారు. అయితే, ఈ రెండు ప్రబంధాలే తిరిగి వారికి లభించాయి — ఇవి భవిష్యత్ తరాల కొరకు ఉంచబడాలని సూచిస్తూ. అందుకే ఈ రెండు ప్రబంధాలను రక్షించి మనకు అందించారు.
తిరుచ్చంద విరుత్తం “విరుత్తప్పా” మరియు “ఆశిరీయ విరుత్తప్పా” అనే తమిళ వ్యాకరణ వర్గాలకు చెందినది. ఇది “తిరువాశిరీయ విరుత్తం” అని కాకుండా “తిరుచ్చంద విరుత్తం” అని ఎందుకు పిలుస్తారని ఎవరికైనా సందేహం కలుగవచ్చు. దీనికి కారణం “చందం” అనగా “అందమైన లయ” అనే అర్థం. తిరుచ్చంద విరుత్తాన్ని అన్ని ఇతర ప్రబంధాలతో పోల్చితే ప్రత్యేకమైన, అద్భుతమైన రాగంలో పెరుమాళ్ళ సన్నిధిలో సేవింపబడుతుంది. అందుకే దీనికి ఈ పేరు వచ్చింది.
ఈ ప్రబంధానికి రెండు తనియన్లు ఉన్నాయి. మొదటిది తిరుచ్చంద విరుత్తం మహిమను చెప్పేది, రెండవది ఆళ్వార్లుల వైభవాన్ని వివరించేది.
మొదటి తనియన్
తరుచ్చందప్ పొళిల్ తళువు తారణియిన్ తుయర్ తీర
తిరుచ్చంద విరుత్తంశెయ్ తిరుమళిసైప్ పరన్ వరుమూర్
కరుచ్చందుమ్ కారగిలుమ్ కమల్ కాంగుమ్ మణణారుమ్
తిరుచ్చందత్తుడన్ మరువు తిరుమళిసై వళం పడియే
ఇది ఆళ్వార్లులు అవతారము పొందిన స్థలమైన తిరుమళిసై మహిమను వివరించటం ద్వారా ప్రారంభమవుతుంది. ఆ స్థలం గంధపు చెట్లు (చందన వృక్షాలు) మరియు అగిలు చెట్లతో నిండి ఉంటుంది. మట్టికి సుగంధం పరిమళిస్తుంది. పెరియ పిరాట్టి ఇక్కడ ఎంతో ఆనందంతో నివసిస్తారు.
ఈ దివ్య భూమిలో జన్మించిన ఆళ్వార్లులు, తిరుచ్చంద విరుత్తం అనే ప్రబంధాన్ని మనకు వరంగా అందించారు – దీన్ని అనుసంధానం భక్తులందరి దుఃఖాన్ని పోగొట్టేందుకు ఈ ప్రబంధాన్నిఅనుగ్రహించారు.
రెండవ తనియన్
ఉలగుమ్ మఝిసైయం ఉళ్ళునరిందు తమ్మిల్
పులవర్పుగళ్ కోలాల్ తూక్క – ఉలగు తన్నై
వైత్తేడుత్త పక్కత్తుమ్ మానీర్ మఝిసైయే
వైత్తేడుత్త పక్కం వలిదు.
ఈ తనియన్ తిరుమళిసై ఆళ్వార్లుల మహిమను కీర్తిస్తుంది. ఒకానొక కాలంలో తపస్సు చేసేందుకు అత్యుత్తమమైన స్థలాన్ని నిర్ణయించాలనే ఉద్దేశంతో బ్రహ్మా ఒక త్రాసును ఉపయోగించారు. ఒక వైపున అతి మహత్తరమైన తీర్థాలను ఉంచి, మరోవైపున తిరుమళిసై దివ్య స్థలమును ఉంచారు. తూకంలో తిరుమళసై ఉన్న వైపు బరువుగా ఉంది. అలాంటిది ఈ దివ్యస్థల మహిమ- ఇక్కడే ఆళ్వార్లులు అవతరించారు.
నాన్ముగన్ తిరువందాథిలో ఆళ్వార్లులు సంసారులకు ఉపదేశం ఇస్తారు — ఈ జగత్తు, బ్రహ్మ దేవుడితో సహా, అతని ద్వారా సృష్టించబడే ఇతర దేవతలన్నీ శ్రీమన్నారాయణుడిచే సృష్టించబడ్డవి అనే సంగతిని స్పష్టంగా తెలియజేస్తారు. అనేక శాస్త్రీయ ఆర్థాలను ఇచ్చి, భక్తులు పరమపదనాథుడైన ఎమ్పెరుమాన్నే శరణు పొందాలని ఉపదేశిస్తారు.
అయితే, సంసారులు ఆ ఉపదేశాన్ని పాటించకపోవడం వల్ల నిరుత్సాహానికి లోనవుతారు. కనీసం తానే అయినా ఆ ఆనందాన్ని కలిగించే ఎంపెరుమాన్ గుణానుభవాన్ని చేసుకోవాలని నిర్ణయిస్తారు.
తిరుచ్చంద విరుత్తంలోని 120 పాశురములలో, ఆళ్వార్లులు అందంగా ఎంపెరుమాన్ ను అనుభవిస్తారు, ఎంపెరుమాన్ పర, వ్యూహ, విభవ, అంతర్యామి, ఆర్చా అయినా అయిదు రూపాలను అనుభవించారు.
- పర – పరమపదంలో ఎంపెరుమాన్ రూపం, ఆయన పరత్వం చూపించటం
- వ్యూహ – తిరుప్పార్కడల్‌లో ఆయన రూపం
- విభవ – ఆయన అనేక అవతారాలు
- అంతర్యామి – ఎంపెరుమాన్ అంతర్భూతుడై ఉండటం
- ఆర్చా – వివిధ దివ్యదేశాలలో ఆయన రూపం
నాన్ముగన్ తిరువందాదిని పరోపదేశంగా చూడవచ్చు, తిరుచ్చంద విరుత్తం అనేది ఎంపెరుమాన్ రూపాలు మరియు గుణాల స్వానుభవంగా ఉంటుంది. అయితే, ఈ ప్రబంధంలో కూడా ఆళ్వార్లులు పరోపదేశం చేస్తారు, తమ మనస్సుతో మాట్లాడుతూ, తమ ఆశ్రీతులకు ఉపదేశించారు.
ఆళ్వార్లులు ఈ ప్రబంధం మొదటి భాగం ఎంపెరుమాన్ మహిమను అనుభవిస్తూ ప్రారంభిస్తారు. అనేక పాశురములలో, ఎంపెరుమాన్ సృష్టి యొక్క కారణం (జగత్‌కారణత్వం), ఉభయ విభూతి నాధుడు, ఆయన ఈ సృష్టిని ఎలా ఆరంభించాడో, ఆయన అన్ని విషయాల్లో ఎలా అంతర్యామి అయ్యారో వివరించబడుతుంది.
18వ పాశురంలో ఆళ్వార్లులు తిరుప్పార్కడల్‌లో ఆదిశేషుని పై విశ్రమించిన ఎంపెరుమాన్ యొక్క వైభవాన్ని పేర్కొంటారు, తద్వారా ఆయన యొక్క వ్యూహ రూపం ను పేర్కొంటున్నారు.
19వ పాశురం నుండి, ఆళ్వార్లులు ఎంపెరుమాన్ యొక్క అనేక అవతారాలను అనుభవిస్తారు. మొదటగా హంసావతారాన్ని అనుభవిస్తారు, ఇందులో హంస రూపంలో బ్రహ్మాకు వేదాలు ఉపదేశిస్తారు, అతను వాటిని మర్చిపోయాడు. తదనంతరం, అనేక ఇతర అవతారాలను అనుభవిస్తారు.
49వ పాశురం నుండి, ఆళ్వార్లులు ఆర్చావతార వైభవాన్ని అనుభవిస్తారు. శ్రీరంగనాథుడు, తిరువెంకటముడయాన్, తిరుక్కుడంతై ఎంపెరుమాన్ (ఆళ్వార్లులుకు అత్యంత ప్రియమైన వారు) మరియు అనేక ఇతర దివ్యదేశాలకు మంగళాశాసనం చేశారు, అంతర్యామి రూపాన్ని కూడా అనుభవిస్తారు. ఆళ్వార్ల హృదయంలో ప్రవేశించేందుకు ఎంపెరుమాన్ ఈ దివ్యదేశాలలో ఇక్కడ ఉన్నాడని భావిస్తారు. ఇది చాలా ముఖ్యమైన సాంప్రదాయ దృక్పధాన్ని ప్రతిబింబిస్తుంది, వివిధ దివ్యదేశాలలో ఎంపెరుమాన్ ఆర్చా రూపాన్ని తీసుకోవడం యొక్క ప్రధాన ఉద్దేశం, అది చివరికి ఆశ్రీతుల హృదయాల్లో ప్రవేశించడమే.
“అత్తనాగి అన్నయ్యాగి…” (115వ పాశురం) ద్వారా ఆళ్వార్లులు ప్రకటిస్తారు, ఎంపెరుమాన్ మోక్షాన్ని ఇస్తానని, ఆళ్వార్లులు తమ హృదయానికి చెప్పడం, ఈ భౌతిక ప్రపంచంలో మున్నీటి సముద్రంలో మునిగిపోవడం వల్ల కలిగే దుఃఖం గురించి బాధపడవద్దని. ఎంపెరుమాన్ “మాసుచ::” అని ప్రకటించారు, కాబట్టి మనం బాధపడకూడదు. పిళ్లై లోకాచార్యులు ముముక్షుపడిలో, ఈ పాశురాన్ని చరమ శ్లోకము యొక్క అర్ధంగా చూపించారు. ఎంపెరుమాన్ మనలను రక్షించేందుకు ఎంతో కృషి చేస్తున్నప్పుడు మనం ఎందుకు బాధపడాలి?
చివరి పాశురం, “ఇయక్కఱాత పల్ పిఱప్పిల్ | ఎన్నై మాత్తి | ఇన్ఱు….” ఆళ్వార్లులు స్పష్టంగా పరమపదం పొందినట్టు ప్రకటిస్తారు. కొందరు ఆళ్వార్లులు స్పష్టంగా మోక్షం పొందినట్టు ప్రకటించారు (ఉదాహరణకు, నమ్మాళ్వార్లు తిరువాయిమొళిలో). ఇలాగే, ఇక్కడ కూడా ఆళ్వార్లులు “అఱాత ఇన్బవీడు పెత్తత్తే…” ద్వారా ఇది ప్రకటిస్తారు.
తిరుమాలై మరియు తిరుపళ్ళియెళుచ్చి
ఈ రెండు ప్రబంధాలను తోండరడిప్పొడి ఆళ్వార్ రచించారు. వారు శ్రీరంగంలో నివసిస్తూ, శ్రీరంగనాథ స్వామికి పుష్ప కంకర్యం (మాలలు తయారు చేసి సమర్పించడం) చేసేవారు. తమను తోండరడిప్పొడి (భక్తుల పాద రేణువు) అని పిలుచుకునేవారు. భగవంతుని పట్ల అపారమైన ప్రేమతో ఎప్పుడూ పెరుమాళ్ళ కోసం మాలలు తయారు చేసేవారు.
“తిరుమాలై తెలియని వారు, తిరుమాల్ (శ్రీమన్నారాయణ) ను కూడా అర్థం చేసుకోలేరు.”
అని నానుడి. అంటే, ఈ ప్రబంధాన్ని మనం తప్పకుండా నేర్చుకోవాలి. ఎందుకంటే ఆళ్వార్లు ఇందులో అనేక రహస్యార్ధాలను అందించారు. మన ఆచార్యులు కూడా ఈ ప్రబంధాన్ని ప్రతి శ్రీవైష్ణవుడూ నేర్చుకోవాలని నిర్దేశించారు.
తిరుమాళై తనియన్ (తిరువరంగపెరుమాళ్ అరయర్ ప్రసాదించినది):
మర్ట్రొ న్టుం వేణ్ణా మనమే। మదిళరంగర్ | కర్ట్రినం మేయ్ త్త। కడ్రలిణైక్కీడ్ర్। ఉర్ట్ర తిరుమాలై పాడుంశీర్। తొండర డిప్పొడియెమ్ పెరుమానై। ఎప్పొదుం। పేశు॥
(అర్థం: పెరియ పెరుమాళ్ పాద కమలాలపై తోండరడిప్పొడి ఆళ్వార్లు పూర్తిగా మనస్సు నిలిపి, మరే ఇతర విషయాన్ని ఆలోచించకుండా ఉన్నారని వివరించబడుతుంది. ఇలాంటి ఏకాగ్రత స్థితిలో ఉన్న తోండరడిప్పొడి ఆళ్వార్లును ఎల్లప్పుడూ ధ్యానించమని అరయ్యర్ తమ మనసుకు సూచిస్తున్నారు.)
తిరుమాలై లోని విషయాలు:
ఇక్కడ ఆళ్వార్లు అనేక అంశాలను ఆస్వాదిస్తున్నారు. వారు మొదట ఎమ్పెరుమాన్ యొక్క తిరునామ సంకీర్తన ప్రారంభిస్తారు. ఎమ్పెరుమాన్ యొక్క దివ్య నామాల మహిమను వివరించారు.
“కావలిల్ పులనై …” అనే పాశురంలో ఆళ్వార్లు, మనం యమునికి భయపడాల్సిన అవసరం లేదని, ఎందుకంటే ఎమ్పెరుమాన్ యొక్క దివ్య నామాలను జపించడం వలన మనం యముని తలపై కాళ్లు ఉంచగలమని చెబుతారు.
తర్వాత, “పచ్చై మా మలై పోల మేని…” అనే పాశురంలో,శ్రీరంగంలో వేంచేసి ఉన్న శ్రీరంగనాథుని గురించి ఆళ్వార్లు మాట్లాడుతూ, పెద్దలు దీనిని త్రితియా విభూతి అని పిలుస్తారు, నిత్య విభూతి,లీలా విభూతి కన్నా వేరైనదంటారని, ఆళ్వార్లకు చాలా ప్రియమైనదని, తాము పరమపదానికి వెళ్లడం కన్నా, శ్రీరంగనాథుని దివ్య అవయవాలను చూడటమే తమ కోరిక అని అంటారు.
మూడో పాశురం నుండీ, ఆళ్వార్లు ఎమ్పెరుమాన్ యొక్క దివ్య గుణాలను మరియు అర్చావతారాల మహిమ ను ఆస్వాదిస్తున్నారు. ఎమ్పెరుమాన్ పైన తమకు ఆసక్తి ఏర్పడింది శ్రీరంగనాథుని అర్చా రూపం ద్వారా మాత్రమే, అదే ఆసక్తి మరింతగా పెరిగిందని సాయిస్తారు. ఎమ్పెరుమాన్ యొక్క దివ్య శరీర సౌందర్యం తమకు పెరుమాళ్ళ పట్ల ప్రేమను పెంచడమే కాదు, తమ మనస్సులో ఉన్న కష్టాలను కూడా తొలగించిందని ఆళ్వార్లు తెలిపారు.
ఆళ్వార్లు అనేక మార్లు నైచ్యానుసంధానం చేశారు. తాము కర్మ, జ్ఞాన, భక్తి యోగాలకు అర్హులము కాదని, కేవలం ఎమ్పెరుమాన్ యొక్క తిరువడి (దివ్య పాదాలను) మాత్రమే పట్టుకోగలనని ప్రకటించారు. తాను ఇంత దయనీయమైన స్థితిలో ఉండి, ఎమ్పెరుమాన్‌ను రక్షించమని వేడుకున్నప్పటికీ ఇంకా ఆయన తమను రక్షించకపోవడానికి ఆశ్చర్యపోతారు. అనేక పాశురాల్లో తానొక్క మంచిపని కూడా చేయని వాడినని, చెడ్డ గుణాలనే నిండుగా కలిగి ఉన్నానని ఆళ్వార్లు బాధ పడతారు.
ఈ ప్రబంధంలోని 38వ పాశురం చాలా ముఖ్యమైనది.
“మేం పొరుళ్ పోగవిట్టు… మైమ్మయై మిక ఉనర్దు…” అనే ఈ పాశురంలో, ఆళ్వార్లు “వాళుమ్ శోంబరై..” అని పేర్కొన్నారు. వీరు రహస్య త్రయం (తత్వత్రయం)ని బాగా నేర్చుకుని, దానిపై పూర్తి నిబద్ధత కలిగి ఉన్నవారు. ఎమ్పెరుమాన్‌కు కైంకర్యం చేయడం కోసం ఎంత కష్టమైన పని అయినా సిద్ధంగా ఉంటారు. అయితే, తమ స్వలాభం కోసం మాత్రం కించిత్తు శ్రమ కూడా చేయరు. అంటే, మన లాభం కోసం ఎంత చిన్న ప్రయత్నం కూడా చేయకూడదు, కానీ ఎమ్పెరుమాన్‌కు కైంకర్యం చేయడంలో మాత్రం ఎంతైనా శ్రమించాలి.
ఈ పాశురం ధ్వయ మహామంత్రం మరియు చరమ శ్లోకానికి అర్థాన్ని బలంగా ప్రతిష్ఠిస్తుంది. అలాగే, ఈ పాశురంలో ఆళ్వార్లు “కాంబరత్ తలై” అన్నప్పుడు, ఇతర ఉపాయాలపై స్వల్పమైన ఆసక్తి కూడా చూపకూడదని, ఇతర ఉపాయాలతో ఏవిధమైన సంబంధం కూడా ఏర్పరచుకోకూడదని అన్నారు.
తర్వాతి పాశురాల్లో, ఆళ్వార్లు భాగవతుల (పైన గమనించిన లక్షణాలున్నవారు) మహిమను వివరించారు. వారితో సంబంధం కలిగి, వారికి కైంకర్యం చేయాల్సిన అవసరాన్ని గురించి చెబుతారు.
చివరగా, 45వ పాశురం “వళ వెళుం తవళమాడ మధురై మానగరం తమ్నుళ్…” లో, ఆళ్వార్లు ఈ ప్రబంధాన్ని ముగిస్తారు. తమ సాధారణ మాటల్నీ, ఎమ్పెరుమాన్ గొప్ప కవిత్వంగా స్వీకరించి తమ వాత్సల్యాన్ని చూపించాడని అంటారు. ఇలాంటి ఎమ్పెరుమాన్‌ను తాను ఈ కృతిలో కీర్తిస్తున్నానని అంటారు.
తిరుప్పళ్ళియెళుచ్చి:
తిరుమాలై తర్వాత, తొండరడిప్పోడి ఆళ్వార్లు మనకు తిరుప్పళ్ళియెళుచ్చి అనే ప్రబంధాన్ని అనుగ్రహించారు. ఇది తిరుప్పళ్ళియెళుచ్చి వ్యాఖ్యానం పరిచయ భాగంలో వివరించబడింది. ఇది చాలా అందమైన ప్రబంధం, ఇందులో ఆళ్వార్లు శ్రీరంగనాథునికి సుప్రభాతాన్ని పాడుతున్నారు.
ఇక్కడ ఒక సందేహం వస్తుంది: ఎమ్పెరుమాన్ ఎప్పుడు నిద్రిస్తారు?
ఎమ్పెరుమాన్ యోగనిద్ర స్థితిలో ఉంటాడు. యోగనిద్ర అంటే, మన కోసం మేలుచేసే మార్గాలపై ఆలోచిస్తూ ఉండడం. అటువంటి స్థితిలో బ్రాహ్మీ ముహూర్తంలో వెళ్లి, ఎమ్పెరుమాన్ ను సుగుణదృష్టితో మేల్కొపితే, ఆయన దివ్య కృపను పొందవచ్చు. ఇది ఎన్నో తరాలుగా కొనసాగుతున్న గొప్ప సంప్రదాయం
వాల్మీకి రామాయణంలో కూడా, విశ్వామిత్ర ఋషి శ్రీరాముని “కౌసల్యా సుప్రజా రామ పూర్వ సంద్యా ప్రవర్తతే…” శ్లోకం ద్వారా మేల్కొల్పినట్లు మనం చూస్తాము. అలాగే, తొండరడిప్పోడి ఆళ్వార్లు కూడా శ్రీరంగనాథుని శిశ్టాచారపూర్వకంగా మేల్కొలిపారు.
తనియన్ 1:
తమేవ మత్వా పరవాసుదేవం
రంగేశయం రాజవధర్హణీయం |
ప్రాబోధికీం యోకృత సూక్తిమాలాం
భక్తాంఘ్రిరేణుం భగవన్తమీడే ||
అద్భుత గుణాలు గల పెరియ పెరుమాళ్, ఆదిశేషనిపై పవళించి ఉండి, చక్రవర్తి లాగా అందరిచేతా పూజించబడుతున్నాడు. పరమపదంలో పరవాసుదేవుడైన పెరియ పెరుమాళ్లను తమ గీత మాలికతో (పామాలై) మనోహరంగా తొందరడిప్పొడి ఆళ్వార్లు నిద్ర లేపుతున్నారు. అట్టి తొందరడిప్పొడి ఆళ్వార్లును నేను పూజిస్తున్నాను.
తనియన్ 2:
మండంగుడి ఎన్బర్ మామరైయోర్ మన్నియ సీర్
తొందరడిప్పొడి తొన్నగరం వండు
తినర్త్త వయల్ తెన్నరంగత్తమ్మానై | పళ్ళి ఉణర్తుంపిరాన్ ఉదిత్త వూర్ |
శ్రీరంగంలో యోగా నిద్రలో ఉన్న పెరియ పెరుమాళ్ళను నిద్ర లేపి మనకు గొప్ప ఉపకారం చేసిన తొందరడిప్పొడి ఆళ్వార్లు యొక్క అవతారస్థలం అయిన మండంగుడి వేదజ్ఞులచే బాగుగా కీర్తించబడింది.
ఈ రెండు తనియన్లు తోండరడిప్పోడి ఆళ్వార్లు యొక్క మహిమ, వారి అవతారస్థలం మరియు పెరియ పెరుమాళ్ గురించి చెబుతున్నాయి.
ఈ ప్రబంధంలో, చాలా పాశురాల్లో దేవతలు, ఋషులు, గంధర్వులు, యక్షులు అందరూ వచ్చి,పెరియ పెరుమాళ్ ను నిద్ర లేపడానికి ఉత్సాహంగా ఎదురుచూస్తున్నట్లు వివరించబడింది. బ్రహ్మా, రుద్ర, స్కంద, ఇంద్ర, వరుణ మొదలైన దేవతలు ఎమ్పెరుమాన్ ను లేపడానికి పోటీ పడుతున్నట్లు ఉంటారు. వారు దేవాలయాన్ని తెరవగానే పెరియ పెరుమాళ్ యొక్క కటాక్షం ముందుగా తమ పై పడాలని ఎదురు చూస్తుంటారు.
మొదటి పాసురంలో, “కధిరవన్ గుణ ధిసై..” ఆళ్వార్లు అంటున్నాడు, భాగవతులు జనసంద్రంగా వేంచేశారు, వారితో వచ్చే వారు పెద్ద-పెద్ద వాయిద్యాల్ని వాయిస్తున్నారు. ఆళ్వార్లు ఎమ్పెరుమాన్ లేచి, తమ ప్రార్ధన స్వీకరించి, తమకు సేవ సాయించాలని ప్రార్ధించారు.
ఆళ్వార్లు ఈ భావనను అన్ని తరువాతి పాశురాలలో సుందరంగా వ్యక్తం చేశారు.
చివరి పాసురంలో, “కడిమలర్ కమలంగళ్..” ఆళ్వార్లు తమ స్థితిని, ఎమ్పెరుమాన్ యొక్క అడియార్ల సేవకుడిగా ప్రకటిస్తారు. వారిని సేవించే భాగ్యాన్ని కోరుకుంటూ ప్రభంధాన్ని ముగిస్తారు.
అమలనాదిపిరాన్:
తిరుప్పాణాళ్వార్ అనుగ్రహించిన ఈ ప్రబంధం మొదలయిరంలో భాగం.
మనందరికీ తిరుప్పాణాళ్వార్ చరిత్ర తెలుసు. వారు పాణర్ కులంలో అవతరించారు. వారికి శ్రీరంగనాథుడి మీద ప్రగాఢమైన ప్రేమ. వారు తమకి పెరియ పెరుమాళ్లే అన్నీ అనుకుంటూ కాలం గడిపేవారు. ఒకసారి, కావేరి నదీ తీరంలో కూర్చొని, పెరియ పెరుమాళ్ యొక్క ఆలయం దిశలో, వీణ వాయిస్తూ, ఎమ్పెరుమాన్ యొక్క అనుభవంలో మునిగిపోయారు. అప్పుడు లోకసారంగ ముని ఆళ్వార్లను అవమానించారు. లోకసారంగ ముని పెరియ పెరుమాళ్ దర్శనానికి వెళ్ళినప్పుడు, స్వామి అతనిని “నంపాణర్” అని పిలిచాడు మరియు తిరుప్పాణాల్వార్ ని తీసుకురావాలని ఆదేశించాడు. ఆ దివ్య ఆదేశాన్ని స్వీకరించిన లోకసారంగ ముని తిరిగి కావేరి నదీ తీరానికి వచ్చి, ఆళ్వార్లను సన్నిధికి వేంచేయమని అభ్యర్థించాడు. అయితే, ఆళ్వార్ శ్రీరంగంలోనికి అడుగు పెట్టడానికి అంగీకరించలేదు. లోకసారంగ ముని వారిని తమ భుజాలపై తీసుకెళ్లతామని ప్రతిపాదించాడు, తద్వారా ఆళ్వార్లు తమ పాదాలు నేలకు పెట్టవలసిన అవసరం లేదు. లోకసారంగ ముని యొక్క అభ్యర్థనపై, ఆళ్వార్లు అంగీకరించారు.
లోకసారంగ ముని భుజాలపై కూర్చుని, తిరుపాణాళ్వార్ సన్నిధి వైపు ప్రయాణిస్తూ, ఆమలనాదిపిరాన్ అనే గొప్ప ప్రబంధాన్ని అనుగ్రహించారు. సన్నిధికి దగ్గరగా వచ్చినప్పుడు, లోకసారంగ ముని ఆళ్వార్లను క్రిందకి( నేల మీదకు) దించారు తిరుపాణాళ్వార్ చివరి పాసురం “కొండల్ వన్ననై..” పాడి, పెరియపెరుమాళ్ యొక్క తిరువడిని పొందారు, నేరుగా పరమపదం చేరారు.
తనియన్ 1: (సంస్కృతంలో)
ఆపాదచూడం అనుభూయ | హరింశయానం |
మధ్యేకవేరదుహితుః | ముదితాన్తరాత్మా |
అద్రష్టృతాం | నయనయోః విషయాంతరాణాం |
యోనిశ్చికాయ మనవై | మునివాహనం తం ||
ఎమ్పెరుమాన్ కావేరి నదీ యొక్క ఉత్తర మరియు దక్షిణ పాయల మధ్యలో శయన తిరుక్కొలమ్ లో వేంచేసి ఉన్నారు. వారిని తిరుప్పాణాళ్వార్ ఎంతో ఆనందంతో ఆపాదమస్తకం అనుభవించారు. స్వామి నేత్ర సౌందర్యం చూసిన ఆళ్వార్లు ఇతర విషయాలు చూడలేమని సాయించారు. ముని వాహనులైన అట్టి ఆళ్వార్లకు ప్రణమిల్లుతున్నాను.
తనియన్ 1: (తమిళంలో)
కాట్టవేకణ్డ పాదకమల | నల్లాడై యున్ది |
తేట్టరుమ్ ఉదరబందం | తిరుమార్వు కణ్డం శెవ్వాయ్ |
వాట్టమిల్ కణ్గళ్ మేని | మునియేఱిత్తని పుకున్దు|
పాట్టినాల్ కణ్డు వాళుమ్| పాణర్ తాళ్ పరవినోమే||
పెరియపెరుమాళ్ యొక్క సన్నిధికి లోకసారంగ ముని భుజాలపై ప్రయాణించి ప్రవేశించిన ఆళ్వార్లు, “మునివాహనులు” గా పిలువబడిన ఆళ్వార్ ఎమ్పెరుమాన్ యొక్క అవయవ సౌందర్యం అనుభవించారు. పెరుమాళ్ళ తిరువడిని, అందమైన వస్త్రాలు, దివ్యమైన నాభి, కడుపు, ఛాతీ, మెడ, పెదాలు, తామరల వంటి కళ్ళు మరియు ఎమ్పెరుమాన్ యొక్క మొత్తం తిరుమేని సౌందర్యాన్ని అనుభవించారు. పెరుమాళ్ళ మహిమను పాడడమే ఆళ్వార్ల లక్ష్యం. అట్టి తిరుప్పాణాళ్వార్లకు నమస్కరిస్తున్నాను.
తిరుప్పాణాళ్వార్ పెరియ పెరుమాళ్ యొక్క మొత్తం దివ్య శరీరాన్ని అద్భుతంగా అనుభవించారు. వ్యాఖ్యానంలో ప్రతి తరువాతి పాశురంలో రెండు రకాల సంబంధాలు ఏర్పడతాయి.
మొదటి రకమైన సంబంధంలో, పరమాత్మ ఆళ్వార్లు పై కురిపించిన కృపను వివరిస్తారు
రెండవ రకమైన సంబంధంలో, ఎమ్పెరుమాన్ శరీరంలోని ప్రతి దివ్య భాగాన్ని ఆళ్వార్లు ఎలా అనుభవిస్తారో చర్చిస్తారు. ఒకరు సముద్రంలో మునిగిపోతుంటే, ఒక చెక్కను పట్టుకుంటే, అలలు దానిని అటూ-ఇటూ నెట్టివేస్తాయి. అదేవిధంగా, పెరుమాళ్ళ దివ్య అవయములు ఆళ్వార్లను ఒక అనుభవం నుండి వేరొకదానికి తరలిస్తున్నాయి.
ఈ ప్రబంధంలో చూపించిన ముఖ్యమైన శాస్త్రార్థం ఏమిటంటే, పరమాత్మ తిరుమేని మన కైంకర్యానికి ప్రతిసంబంధి, మరియు మనకు ఉపేయం.
ప్రతి పాశురంలో, ఆళ్వార్లు స్వామి శరీరంలోని ఒక్కొక్క అవయవ సౌందర్యాన్ని అనుభవించారు. మొదట, ఎమ్పెరుమాన్ కమల చక్షువులు ఆళ్వార్లను మంత్రముగ్ధుల్ని చేశాయి. తరువాత వారు ఎమ్పెరుమాన్ సంపూర్ణ తిరుమేనిని అనుభవిస్తారు.
చివరి పాశురంలో, “కొండల్ వన్ననై..” అని ఆళ్వార్లు ఈ ప్రబంధాన్ని ముగిస్తూ, పెరుమాళ్ళ అందమైన కలువ పూవులవంటి నేత్రాలను మరియు దివ్య శరీరాన్ని చూసిన తర్వాత, తాము పరమపదనాధుడిని, ఇతర అర్చావతారాలను కూడా చూడబోమని ప్రతిజ్ఞ చేస్తారు
ఈ విధంగా, ముదలాయిరమ్ భాగంగా ఉన్న అన్ని ప్రబంధాల యొక్క సంక్షిప్త అవలోకనం మనం చూశాం.
ఆధారం: https://youtu.be/nUInuo9g6Lk
ఆంగ్లం లో: https://divyaprabandham.koyil.org/index.php/2023/11/simple-guide-to-dhivyaprabandham-part-3/
మూలము : https://divyaprabandham.koyil.org
ప్రమేయము (గమ్యము) – https://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org