శ్రీః
శ్రీమతే శఠకోపాయ నమః
శ్రీమతే రామానుజాయ నమః
శ్రీమత్ వరవరమునయే నమః
అవతారిక
తనకు అందుబాటులో ఉన్న అచార్యునిపై విశ్వాసము లేక , ఆశ్రయించుటకు దూరస్తుడైన భగవంతుని ఇష్టపడు వారు బుధ్ధిహీనులని 33,34 పాశురాలలో చెప్పారు. ఈ పాశురములో గురువు మీద ప్రీతి లేని వారిని భగవంతుడు ఉపేక్షించక శిక్షిస్తాడని ఉదాహరణ సహితముగా చెపుతున్నారు.
పాశురము
ఎన్ఱుం అనైత్తుయిఱ్కుం ఈరం సెయ్ నారణనుం
అన్ఱుం తన్ ఆరియన్ పాల్ అంబు ఒళియిల్ నిన్ఱ
పునల్ పిరింద పంగయతై పొంగు సుడర్ వెయ్యోన్
అనల్ ఉమిళందు తాన్ ఉలర్తియఱ్ఱు
ప్రతిపదార్థము
నిన్ఱ పునల్ = తంకు ఆధారమైన నీటిని
పిరింద = వదలిన
పంగయతై = తామరపూవును
పొంగు సుడర్ = ప్రాకాశించే కాంతి వున్న
వెయ్యోన్ = వేడి కిరణములను ప్రసరించే సూర్యుడు
తాన్ = మునుపు ఆ పూవు వికసించుటకు కారణమైన వాడు
అనల్ ఉమిళందు = నిప్పులు కక్కి
ఉలర్తియఱ్ఱు = వాడిపోయేట్టు చేస్తాడు
ఎన్ఱుం = ఎప్పుటికీ
అనైత్తుయిఱ్కుం = సకల జీవరాశులకు
ఈరం సెయ్ = కరుణ చూపే
నారణనుం = నారాయణుడు
తాన్ ఆరియన్ పాల్ = తన ఆచార్యుని విషయములో
అంబు ఒళియిల్ = భక్తిలో లోపము ఏర్పడితే
అన్ఱుం = కోపముతో దహించి వేస్తాడు
వ్యాఖ్యానము
ఎన్ఱుం ………భూత,భవిష్యత్ , వర్తమాన కాలాలములనే త్రికాలాలలోను
అనైత్తుయిఱ్కుం………సకల ఆత్మలకు
ఈరం సెయి నారణనుం…….సదా కృపను చూపు నారాయణుడు…. ఇక్కడ నారాయణుడు అన్నప్రయోగము వలన జీవాత్మకు , పరమాత్మకు విడదీయరాని సంబంధమును తెలియజేస్తున్నది . నారములనగా సమస్త జీవరాశులు , అయనమనగా సమస్త జీవులకు అంతరమున, బాహ్యమున ఆధారమైన వాడు అని అర్థము . ఈ భావనను ఆండాళ్ ‘ “ఉందన్నోడు ఉరవేల్ నమక్కు ఇంగు ఒళిక్క ఒళియాదు” ( తిరుప్పావై 28) లో అన్నది . స్వామి తిరుమళిసై అళ్వార్ కూడా “నాన్ ఉన్నై అన్ఱి ఇలేన్ కండాయ్ నారణనే!!! నీ ఎన్నై అన్ఱీ ఇలై” అన్నారు . దీని వలన జ్ఞానమున్న ఆత్మలకు, జ్ఞాన శూన్యమై జడ పదార్థములైన నారములకు ప్రాణాధారమై లోపల ఉండి చేతనత్వము కలిగించు వాడు “నారాయణుడు” అని అర్థమును తెలుపుతున్నారు . సమస్త జీవులు చేయు దోషములను గుణములుగా స్వీకరించు వాడు , వశ్చలుడు , సమస్త జీవులపై కృపను చూపు వాడు“నారాయణుడు” అని ఆయన గుణములను తెలియ జేస్తున్నారు.
అన్ఱుం …….దండించు వాడు,కోపగించు వాడు అని అర్థము .“అన్ఱియ వాణన్” పెరియ తిరుమొళిలో (1275) కోపించిన అన్న అర్థములోనే చెప్పారు . ఆయన కృపా సముద్రుడు కాదా! ఆయనకు కోపము ఎప్పుడు వస్తుంది? అంటే ……
తన్ఆరియన్ పాల్ అన్ బు ఒళియిల్ …..…తన గురువుపై భక్తి లేని వారిపై కోపిస్తాడు . మునుపు “ఎట్ట ఇరుంద గురువై” , “పఱ్ఱు గురువై”, అన్న రెండు పాశురాలలో గురువుపై విశ్వాసము లేని వాడు, గురువును సామాన్యునిగా భావించి ,తన దైవముగా భావించని వాడిపై కోపిస్తాడు అని చెప్పారు. ఈ విషయముగా ఇక్కడ చక్కటి ఉదాహరణ ఇస్తున్నారు .
నిన్ఱ పునల్ పిరింద పంగయతై .……..లోకములోని జీవులన్నింటికీ ఆధారభూతుడైన సూర్యుడు తన ప్రకాశవంతమైన కిరణాల ద్వారా వేడిని వెలుగును ప్రసరింప చేస్తాడు . కొలనులోని తామరలను సూర్యుడు తన కిరణాలను ప్రసరించి వికసింపచేస్తాడు. అదే తామర నీటిని విడిచి బయట వుంటే ఆ సూర్యుడు ఏమి చెస్తాడో వివరిస్తున్నారు .
పొంగు సుడర్ వెయ్యోన్……కులశేఖరాళ్వార్లు “సెంగమలం అందరం సేర్ వెంగదిరోరుక్కల్లాల్ ” అన్నట్లుగా సూర్య కిరణాలు లేనిదే తామర వికసించదు. కృత్రిమమైన వెలుగును ప్రసరింపచేయటము ద్వార వికసింప చేయాలని ప్రయత్నించినా ఫలితము ఉండదు . తామర నీటిలో ఉన్నంత వరకు నీరు , సూర్యుని వేడి అది వికసించడానికి ఉపకరిస్తాడు . అదే సూర్యుని వేడి తామర నీటిని వదిలి బయటకు వస్తే ………..
అనల్ ఉమిళందు తాన్ ఉలర్తియఱ్ఱు ……… సూర్యుడి ప్రతాపమునకు వాడి పోతుంది . అలాగే ఆచార్య భక్తి వున్న వాడిపై శ్రీమన్నారాయణుని కృప ఉంటుంది . ఆచార్య భక్తి లేని వాడిపై శ్రీమన్నారాయణుడు తన కోపమును ప్రదర్శిస్తాడు . ఈ ఉదాహరణ ఆచార్య భక్తి కలిగివుండటము ఎంత అవసరమో తెలియజేస్తున్నది . ఆచార్య భక్తి వున్న వాడికి శ్రీమన్నారాయణుని కృప వలన జ్ఞానము అభివృధ్ధి చెందుతుంది . ఆచార్య భక్తి లేని వాడికి శ్రీమన్నారాయణుని కృప లేక పోవటము చేత వున్న జ్ఞానము కూడా తొలగి పొయి అజ్ఞానిగా మిగులు తాడు . కావున మంత్రోపదేశము చేసిన ఆచార్యుని మీద భక్తి లేని వాడిని కరుణాసముద్రుడైన శ్రీమన్నారాయ ణుడు కూడ కరుణించక పోగా తన కోపమును చూపుతాడు . నీటిలో వున్న తామర వికశించడానికి కారణమైన సూర్యుడే , నీటిని వదలిన తామర వాడిపోవడానికి కారణమవుతాడు . ఆచార్య భక్తి ఉన్న శిష్యుడి జ్ఞానము అభివృద్ధి చెందడానికి ఉపకరించిన శ్రీమన్నారాయణుడే , ఆచార్య భక్తి లేని శిష్యుడిని జ్ఞాన శూన్యునిగా చేస్తాడు . ఈ సందర్భములో తిరువళ్ళువర్ చెప్పిన “ఉళరెనినుం ఇల్లారోడొప్పర్” అన్న వార్త అనుసంధానము చేసుకోవాలి . శ్రీవచనభూషణము చూర్ణిక -439లో “తామరైయై అలర్థ కడవ ఆదిత్యన్ తానే, నీరైప్పిరిందాల్ అత్తైఉలర్తుమాపోలే, స్వరూప వికాసత్తై పణ్ణుం ఈశ్వరన్ తానే ఆచార్య సంబంధం కులైందాల్ అత్తై వాడ పణ్ణుం “చూర్ణికై-439 ) అని చెప్పారు .
అడియేన్ చూడామణి రామానుజ దాసి
మూలము: http://divyaprabandham.koyil.org/index.php/2015/02/gyana-saram-35-enrum-anaithuyirkum/
పొందుపరిచిన స్థానము: http://divyaprabandham.koyil.org/
ప్రమేయము (గమ్యము) – http://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org